ហូជីមិញ៖ នៅថ្ងៃអង្គារម្សិលមិញវៀតណាមបានរាយការណ៍ពីករណីដំបូងនៃមេរោគបំលែងខ្លួនថ្មីក្នុងសហគមន៍ Omicron ចំនួន ៣ករណី ដែលបានរកឃើញនៅទីក្រុងហូជីមិញ។
បើតាមមន្រ្តីក្នុងតំបន់បានឱ្យដឹងថា អ្នកជំងឺបានទៅព្យាបាលនៅគ្លីនិកឯកជនមួយ ដើម្បីព្យាបាល ដែលនាពេលនេះពួកគេមានអាការៈ ហៀរសំបោរ និងឈឺបំពង់ក។
បន្ទាប់ពីការធ្វើតេស្តរហ័សបង្ហាញថាពួកគេមានភាពវិជ្ជមាន Covid 19 បន្ទាប់មកគ្លីនិកក៏បានបញ្ជូនសំណាករបស់ពួកគេទៅមន្ទីរពេទ្យសម្រាប់ការធ្វើតេស្តបញ្ជាក់ PCR ។
ក្រោយមកនៅរសៀលថ្ងៃអង្គារ វាបានបញ្ជាក់ថា ពួកគេបានឆ្លងមេរោគមេរោគបំលែងខ្លួនថ្មី Omicron ។
អ្នកជំងឺទាំង៣នាក់នោះមានអាយុ៣៥ឆ្នាំ រស់នៅស្រុកប៊ិញចាញ់ អាយុ៣១ឆ្នាំ នៅស្រុក១១ និងអាយុ៤៨ឆ្នាំ នៅស្រុកកូវ។
បច្ចុប្បន្ននេះអាជ្ញាធរមូលដ្ឋានកំពុងតាមដាននិងរកអ្នកពាក់ព័ន្ធនឹងបុគ្គលទាំងបីនេះ។
គួរបញ្ជាក់ផងដែរថា កន្លងមកវៀតណាមបានរាយការណ៍ករណី Omicron ចំនួន ៧០ ករណីរួចមកហើយជាករណីនាំចូល។ ជាមួយគ្នានេះ ក្រសួងសុខាភិបាលក៏ធ្លាប់បានព្រមានពី ហានិភ័យនៃការរីករាលដាល Omicron នៅក្នុងប្រទេសវៀតណាដែលមានកម្រិតខ្ពស់ ដែលអាចនឹងប៉ះពាល់ដល់ប្រព័ន្ធសុខាភិបាល៕